काठमाडौं, मंसिर १०। खल्तीमा नोटको सट्टा स्मार्टफोन बोकेर डिजिटल भुक्तानी गर्ने नेपालीहरूको सङ्ख्या दिनप्रतिदिन बढ्दो छ ।पछिल्लो समय नगदरहित कारोबारको सीमा र दायरा फराकिलो बन्दै गएको छ । दैनिक उपभोग्य वस्तु खरिद–बिक्रीदेखि लाखौँको आर्थिक कारोबार डिजिटल रूपमै हुन थालेको छ ।
नगद कारोबारभन्दा वालेट, मोबाइल बैंकिङ, इन्टरनेट बैंकिङ, कनेक्ट आईपीएस जस्ता माध्यमको प्रयोग गर्नेहरू उल्लेख्य बढेका छन् । नेपाल राष्ट्र बैंकको पछिल्लो तथ्यांक अनुसार एक वर्षमै ३२ लाख ३९ हजारभन्दा बढी मोबाइल बैंकिङ प्रयोगकर्ता थपिएका छन् । २०८० को असोजसम्म २ करोड २२ लाख ८४ हजार ६२२ मोबाइल बैंकिङ प्रयोगकर्ता रहेकोमा २०८१ को असोजसम्म यो बढेर सङ्ख्या २ करोड ५५ लाख २४ हजार १८९ पुगेको हो ।
वालेट प्रयोगकर्ताहरूको सङ्ख्या पनि उल्लेख्य बढेको छ । नेपालमा डिजिटल वालेट प्रयोगकर्ताको सङ्ख्या एक वर्षमै ४३ लाख भन्दा बढी थपिएको छ । २०८० को असोजदेखि २०८१ को असोजसम्म ४३ लाख १९ हजार ९२९ जना नयाँ वालेट प्रयोगकर्ता थपिएका हुन् । २०८० को असोजसम्म नेपालमा डिजिटल वालेट प्रयोगकर्ताको सङ्ख्या दुई करोड २ लाख ७६ हजार १६१ थियो । उक्त सङ्ख्या २०८१ को असोजसम्म आइपुग्दा दुई करोड ४५ लाख ९६ हजार ९० पुगेको छ ।
