काठमाडौं, भदौ ३०। आइतबारको मन्त्रिपरिषद बैठकले संघीय संसदको चालु वर्षे अधिवेशन अन्त्य गर्न सिफारिस गरेको छ । सरकारले राष्ट्रपति समक्ष भोलि सोमबार राति १२ बाट वर्षे अधिवेशन अन्त्य गर्ने गरी सिफारिस गरेको हो ।
संबैधानिक व्यवस्था बमोजिम मन्त्रिपरिषदको सिफारिसमा राष्ट्रपतिले संसदको अधिवेशन बोलाउने र अन्त्य गर्ने गरिन्छ ।
गत बैशाख २८ गतेबाट सुरु भएको अधिवेशनले वजेट, बजेटसँग सम्बन्धित विधेयकहरुलगायत विभिन्न विधेयकहरु समेत पारित गरेर अन्त्य हुन लागेको छ । महत्वपूर्ण मानिएको संक्रमणकालीन न्याय सम्बन्धी विधेयक (बेपत्ता पारिएका व्यक्तिको छानबिन, सत्य निरुपण तथा मेलमिलाप आयोग ऐन २०७१ लाई संशोधन गर्न बनेको विधेयक) समेत यही अधिवेशनले पास गरेको थियो ।
